కోరుకున్న జీవితం...కానీ చిరాకులు,పరాకులు

కోరుకున్నాం... వచ్చింది... ఇప్పుడు?

కారు కొన్నాం.
అప్పుడు ఆనందం.
ఇప్పుడు ట్రాఫిక్.

ఉద్యోగం కావాలనుకున్నాం.
వచ్చింది.
ఇప్పుడు Monday అంటేనే ముఖం మాడిపోతుంది.

సొంత ఇల్లు కావాలనుకున్నాం.
ఇల్లు వచ్చింది.
ఇప్పుడు EMI, maintenance, cleaning.

పిల్లలు కావాలనుకున్నాం.
పిల్లలు వచ్చారు.
ఇప్పుడు ఇంట్లో ఐదు నిమిషాలు నిశ్శబ్దం ఉండదని బాధ.

ఆరోగ్యంగా ఉండాలని అనుకున్నాం.
ఇప్పుడు exercise చేయాలి.
అంటే అదీ ఒక బాధ్యతే.

ఇదంతా చూస్తుంటే మనిషి కోరికల లైఫ్‌ సైకిల్‌ కామెడీగా ఉంటుంది
ఏదైనా కావాలి.
అది వచ్చేవరకు దాని కోసం ఎదురుచూస్తాం.
వచ్చాక దానికి సంబంధించిన పనుల మీద చిరాకు పడతాం.

కావాలి... కానీ వద్దు

కారు కావాలి.
కానీ traffic వద్దు.

ఉద్యోగం కావాలి.
కానీ work pressure వద్దు.

ఇల్లు కావాలి.
కానీ ఇంటి పనులు వద్దు.

కుటుంబం కావాలి.
కానీ responsibilities వద్దు.

ఆరోగ్యం కావాలి.
కానీ workout వద్దు.

అంటే మనకు జీవితం మొత్తం కావాలి.
కానీ దాని చిన్న అక్షరాల్లో రాసి ఉన్న terms & conditions మాత్రం చదవం.

ఇబ్బంది పెడుతున్న విషయాలే... మన అదృష్టాలకు గుర్తులు

నిజానికి మనకు ఇబ్బంది పెడుతున్న చాలా విషయాలు, మన జీవితం ఎంత చక్కగా ఉందో తెలియజేసే చిన్న చిన్న గుర్తులు..

ట్రాఫిక్ ఉందంటే కారు ఉంది.
పని ఉందంటే ఉద్యోగం ఉంది.
వంట చేయాల్సి వస్తోందంటే ఇంట్లో తినేవాళ్లు ఉన్నారు.
ఇల్లు సర్దాల్సి వస్తోందంటే ఇల్లు ఉంది.
పిల్లల గోల ఉందంటే వాళ్లు మన దగ్గరే ఉన్నారు.
వ్యాయామం కష్టంగా అనిపిస్తోందంటే శరీరం ఇంకా మనతో సహకరిస్తోంది.

అంతే.

ఇవి పెద్ద philosophical truths ఏమీ కావు.
మన రోజువారీ జీవితంలో మనం గమనించకుండా దాటేస్తున్న చిన్న విషయాలు.

నటించాల్సిన పని లేదు

అయితే ప్రతి కష్టాన్నీ చూసి "అబ్బా, ఎంత అదృష్టం!" అని నటించాల్సిన అవసరం కూడా లేదు.

ట్రాఫిక్‌లో చిక్కుకున్నప్పుడు చిరాకు రావచ్చు.
పని ఎక్కువైతే విసుగు రావచ్చు.
పిల్లలు గది మొత్తం తలకిందులు చేస్తే కోపం రావచ్చు.

అదే జీవితం.

జీవితం పట్ల కృతజ్ఞతగా (Gratitude) ఉండాలంటే ఫిర్యాదులు (Complaints) లేకపోవడం కాదు.
ఫిర్యాదు చేస్తూనే… అసలు మనం దేనికి ఫిర్యాదు చేస్తున్నామో ఒక్కసారి చూసుకోవడం.

ఎప్పుడో కావాలనుకున్నదే కదా ఇది.
ఒకప్పుడు మనం ఊహించిన భవిష్యత్తు, ఈరోజు మన ordinary Tuesday అయిపోయి ఉండొచ్చు.
అందుకే అది ordinary అయిపోయిందని విలువ తగ్గిపోదు.

కొత్త కారు మొదటి రోజున ఇచ్చిన ఆనందం, ఇప్పుడు అది మనకు సాధారణంగా కనిపిస్తోందని మాయమైపోలేదు.
కొత్త ఇల్లు మొదటిసారి తలుపు తెరిచినప్పుడు కలిగిన భావన, ఇప్పుడు దాని తాళం ప్రతిరోజూ తిప్పుతున్నామనే కారణంతో చిన్నది కాలేదు.

బహుశా అక్కడే మర్చిపోతాం

కొన్ని విషయాలు మన జీవితంలోకి వచ్చిన తర్వాత అంతగా కలిసిపోతాయి…
వాటిని మన జీవితంలో భాగంగానే చూడటం మొదలుపెడతాం.

బహుశా అక్కడే మనం ఒక చిన్న విషయం మర్చిపోతాం.

మనకు సాధారణంగా కనిపిస్తున్న జీవితం కూడా ఒకప్పుడు మనం కోరుకున్న కలల సౌధం.

కాబట్టి కంప్లైంట్లు ఉండనివ్వండి.
అలసట ఉండనివ్వండి.
కొన్ని రోజులు "ఇదేం జీవితం రా బాబూ" అనిపించనివ్వండి.

కానీ మధ్యలో ఒక్కసారి వెనక్కి చూసి నవ్వుకోవాలి.

మనం కావాలని కోరుకున్నవే కదా ఇవన్నీ.
ఇప్పుడు అవే మనల్ని కాస్త విసిగిస్తూ బిజీగా ఉంచుతున్నాయి.

అదే జీవితం చేసే చిన్న మాయ.